Longitudo uerum terrae Iudaeae a Dan usque Bersabee 
 praetenditur ab aquilonali plaga in meridiem producta. Dan 
 quippe uicus exiguus est in exterioribus Iudaeae, quae septentrionalem 
 partem contuentur, in quarto a Paneade miliario 
 Tyrum pergentibus, de quo Iordanis erumpens a loco nomen 
 sortitus est. Ior uero Ebraei fluuium appellant. Ceterum 
 Bersabee, ut supra diximus, ad austrum uergens uicus est 
 maximus uicesimo a Chebron miliario.