Sanctorum passionem martyrum qui Agaunum glorioso 
 sanguine inlustrant pro honore gestorum stilo explicamus, ea 
 utique fide qua ad nos martyrii ordo peruenit. nam per 
 succedentium relationem rei gestae memoriam nondum intercepit 
 obliuio, etsi pro martyribus singulis loca singula quae 
 eos possident uel singulae urbes insignes habentur, nec inmerito, 
 quia pro deo summo pretiosas sancti animas refundunt. 
 quanta excolendus est reuerentia sacer ille Agaunensium locus 
 in quo tot pro Christo martyrum milia ferro caesa referuntur? 
 nunc iam ipsam beatissimae passionis causam loquamur.