Tibi adstant angeli et archangeli numerus inaestimabilis, timentes et pauentes honorem et uirtutem tuam, clamantes uoce magna dicentes: sanctus sanctus sanctus Dominus Deus Sabaoth. tu ipse nobis testamentum fecisti et pollicitus es dicens: petite et accipietis, quaerite et inuenietis, pulsate et aperietur uobis. quodcumque a patre meo petieritis in nomine meo, ego in tuo nomine peto ut accipiam. ego quaero ut inueniam, ego pulso ut aperiatur mihi. paratus sum propter nomen tuum uictimam sanguinis effundere et quodcumque tormentum sustinere. tu es adiutor meus: defende me ab aduersaria parte, angelus tuus lucis protegat me, quoniam tu dixisti: quidquid credentes petieritis per orationem, dabitur uobis.