plana solo, ratibus clemens; quae respicit Arcton, inmitis, scopulosa, procax subitisque sonora flatibus; insanos infamat navita montes. hic hominum pecudumque lues, sic 1 pestifer aer saevit et exclusis regnant Aquilonibus Austri. Quos ubi luctatis procul effugere carinis, per diversa ruunt sinuosae litora terrae. pars adit antiqua ductos Carthagine Sulcos; partem litoreo complectitur Olbia muro. urbs Libyam contra Tyrio fundata potenti tenditur in longum Caralis tenuemque per undas obvia dimittit fracturum flamina collem; efficitur portus medium mare, tutaque ventis omnibus ingenti mansuescunt stagna recessu. hanc omni petiere manu prorisque reductis suspensa Zephyros expectant classe faventes.