sitque palam Gallos causa, non robore vinci. nec vos, barbariem quamvis collegerit omnem, terreat. an Mauri fremitum raucosque repulsus umbonum et vestros passuri comminus enses? non contra clipeis tectos gladiisque micantes ibitis: in solis longe fiducia telis. exarmatus erit, cum missile torserit, hostis. dextra movet iaculum, praetentat pallia laeva; cetera nudus eques. sonipes ignarus habenae; virga regit, non ulla fides, non agminis ordo: arma oneri, fuga praesidio. conubia mille; non illis generis nexus, non pignora curae: sed numero languet pietas. haec copia vulgi. umbratus dux ipse rosis et marcidus ibit unguentis crudusque cibo titubansque Lyaeo, confectus senio, morbis stuprisque solutus.