et Quincti Curiique seges, patriaeque petenti rusticus inferret proprias dictator aristas. Nunc quid agam? Libyam Gildo tenet, altera Nilum. ast ego, quae terras umeris pontumque subegi, deseror: emeritae iam praemia nulla senectae. di, quibus iratis crevi, succurrite tandem, exorate patrem; tuque o si sponte per altum vecta Palatinis mutasti collibus Idam praelatoque lavas Phrygios Almone leones, maternis precibus natum iam flecte, Cybebe. sin prohibent Parcae falsisque elusa vetustas auspiciis, alio saltem prosternite casu et poenae mutate genus. Porsenna reducat Tarquinios; renovet ferales Allia pugnas; me potius saevi manibus permittite Pyrrhi, me Senonum furiis, Brenni me reddite flammis.