Ceterum, dilectissimi, dum de pastore erepto lugemus, 
 nascitur de perdito fratre dolendi occasio. praecisum est a nobis 
 membrum, pars nostri facta est pars Donati, transiit miles domini 
 ad castra Philistinorum et de uase honoris factum est uas 
 dedecoris. intellegitis quid dico. miser ille Rusticianus Mutigensis 
 diaconus sacramentum quod ecclesiae debebat abiecit et ordinem 
 suum infideli participatione polluit. quid non feci, quos non 
 adhibui conatus, ut in praecipitium ruentem in plano collocarem 
 et eximerem periculo, qui periculum amabat in quo periit! is 
 prima et urgens fuit cura mea qui nunc est dolor meus. nolebam 
 mihi subtrahi in ipso oneris mei exordio quem a satis longo 
 tempore uidebam tamquam fulgur de caelo cadentem. et licet 
 ipse exigentibus peccatis suis a domino deseri meruerit, doleo 
 tamen quod de eo ad dominum meum dicere non possum: \'ecce 
 me cum pueris quos dedisti mihi.\'