Donatista dixit: Adhuc eius aquas Ambacum propheta 
 spiritu manifestat: inposuisti, inquit, in mari equos tuos 
 turbantes aquas multas. me contempsit Galaat ciuitas, 
 quae operatur stulta turbans aquas. et fortitudo 
 tua sicut hominis piratae. 
 
 Catholicus respondit: Agnosce in te tua tela, sicut scriptum est: 
 gladius eorum intret in corda ipsorum et arcus eorum 
 confringatur. fortitudo tua, Donatista, sicut hominis 
 piratae, qui uiribus rebaptizas, uiribus in aqua pugnas, uiribus 
 in aqua necas. ista gerens pirata captus occideris, nisi conuersus 
 paenitueris et regi Christo in catholica militaris.