Ridiculum, inquis. istuc est, cum omnes hanc se 
 profiteantur tenere ac docere. profitentur hac omnes haeretici, 
 negare non possum, sed ita, ut eis, quos inlectant, rationem 
 se de obscurissimis rebus polliceantur reddituros, eoque 
 catholicam maxime criminantur, quod illis, qui ad eam ueniunt, 
 praecipitur, ut credant, se autem non iugum credendi inponere, 
 sed docendi fontem aperire gloriantur. quid, inquis, dici potuit, 
 quod ad eorum laudem maxime pertineret? non ita est. hoc 
 enim faciunt nullo robore praediti, sed ut aliquam concilient 
 multitudinem nomine rationis: qua promissa naturaliter anima 
 gaudet humana nec uires suas ualetudinemque considerans 
 sanorum escas adpetendo, quae male committuntur nisi ualentibus, 
 inruit in uenena fallentium. nam uera religio, nisi credantur 
 ea. quae quisque postea, si se bene gesserit dignusque 
 fuerit, adsequatur atque percipiat, et omnino sine quodam 
 graui auctoritatis imperio inire recte nullo pacto potest.