Puta nos adhuc neminem audisse cuiuspiam religionis 
 insinuatorem. ecce res noua est a nobis negotiumque susceptum. 
 quaerendi sunt, credo, huius rei, si ulla est, professores. 
 fac nos repperisse alios aliud opinantes et diuersitate opinionum 
 ad se quemque trahere cupientes. sed inter hos excellere famae 
 interim celebritate quosdam atque omnium paene occupatione 
 populorum. utrum isti uerum teneant. magna quaestio est; sed 
 nonne prius sunt explorandi, ut, quamdiu erramus, si quidem 
 homines sumus, cum ipso genere humano errare uideamur?