Et quid est lux ipsa, quae facta est? utrum spiritale 
 quid an corporale? si enim spiritale, potest ipsa esse prima 
 creatura iam hoc dicto perfecta, quae primo caelum appellata 
 est, cum dictum est: in principio fecit deus caelum et 
 terram, ut, quod dixit deus: fiat lux. et facta est lux, 
 eam reuocante ad se creatore conuersio eius facta atque inluminata 
 intellegatur. 
 Et cur ita dictum est: in principio fecit deus caelum 
 et terram, et non dictum est: in principio dixit deus: fiat 
 caelum et terra. et facta sunt caelum et terra, sicut de luce 
 narratur: dixit deus: fiat lux. et facta est lux? utrum 
 prius uniuersaliter nomine caeli et terrae conprehendendum 
 erat et commendandum, quod fecit deus, et deinde per partes 
 exequendum, quomodo fecit, cum per singula dicitur: dixit 
 deus, id est, quia per uerbum suum fecit, quidquid fecit?