Isicia exsphondylis: elixatos sphondylos conteres et nervos eorum eximos, deinde cum eis alicam elixatam et ova conteres, pipere posito. in omento assabis, oenogaro perfundes, et pro isiciis inferes.

Isicia omentata: pulpam concisam teres cum medulla siliginis in vino infusi. piper, liquamen, si velis, et bacam myrtae exenteratam simul conteres. pusilla isicia formabis, intus nucleis et pipere positis. involuta omento subassabis cum caroeno.