nec eo minus contumeliis obnoxius uixit. nam et si paulo serius ad praedictam cenae
 horam occurrisset, non nisi aegre et circuito demum triclinio recipiebatur, et quotiens
 post cibum addormisceret, quod ei fere accidebat, olearum aut palmularum ossibus
 incessebatur, interdum ferula flagroue uelut per ludum excitabatur a copreis. solebant
 et manibus stertentis socci induci, ut repente expergefactus faciem sibimet
 confricaret.