Inter cetera in eo mirati sunt homines et obliuionem et inconsiderantiam, uel ut Graece
 dicam, μετεωρίαν et ἀβλεψίαν . occisa Messalina, paulo post quam in triclinio decubuit, cur
 domina non ueniret requisiit. multos ex iis, quos capite damnauerat, postero statim die
 et in consilium et ad aleae lusum admoneri iussit et, quasi morarentur, ut somniculosos
 per nuntium increpuit. ducturus contra fas Agrippinam
 uxorem, non cessauit omni oratione filiam et alumnam et in gremio suo natam atque
 educatam praedicare. adsciturus in nomen Neronem, quasi parum reprehenderetur, quod
 adulto iam filio priuignum adoptaret, identidem diuulgauit neminem umquam per adoptionem
 familiae Claudiae insertum.