Gestar ad haec (namque impatiens asperque coquebat iamdudum immites iras mediamque loquentis bis conatus erat turbando abrumpere uocem) Concilione inquit ‘Libyae Tyrioque senatu, pro superi, Ausonius miles sedet, armaque tantum haud dum sumpta uiro? nam cetera non latet hostis. nunc geminas Alpes Apenninumque minatur, nunc freta Sicaniae et Scyllaei litoris undas, nec procul est quin iam manes umbrasque pauescat Dardanias: tanta accumulat praeconia leto uulneribusque uirum ac tollit sub sidera gentem. mortalem, mihi crede, licet formidine turpi frigida corda tremant, mortalem sumimus hostem. uidi ego, cum, geminas artis post terga catenis euinctus palmas, uulgo traheretur ouante carceris in tenebras spes et fiducia gentis Regulus Hectoreae; uidi, cum robore pendens Hesperiam cruce sublimis spectaret ab alta. nec uero terrent puerilia protinus ora sub galea et pressae properata casside malae. indole non adeo segni sumus: aspice, turmae quot Libycae certant annos anteire labore et nudis bellantur equis; ipse, aspice, ductor, cum primam tenero uocem proferret ab ore, iam bella et lituos ac flammis urere gentem iurabat Phrygiam atque animo patria arma mouebat. proinde polo crescant Alpes, astrisque coruscos Apenninus agat scopulos: per saxa niuesque (dicam etenim, ut stimulent atram uel inania mentem), per caelum est qui pandat iter: pudet Hercule tritas