ferte leues auras flatusque ciete secundos, si nondum insultat templorum Poenicus ignis culminibus, Latiaeque ualent succurrere classes.’ Talibus inlacrimant noctemque diemque querelis, donec Laurentis puppis defertur ad oras, qua pater acceptis Anienis ditior undis in pontum flauo descendit gurgite Thybris. hinc consanguineae subeunt iam moenia Romae. Concilium uocat augustum castaque beatos paupertate patres ac nomina parta triumphis consul et aequantem superos uirtute senatum. facta animosa uiros et recti sacra cupido attollunt, hirtaeque togae neglectaque mensa dexteraque a curuis capulo non segnis aratris. exiguo faciles et opum non indiga corda, ad paruos curru remeabant saepe penates. In foribus sacris primoque in limine templi captiui currus, belli decus, armaque rapta pugnantum ducibus saeuaeque in Marte secures, perfossi clipei et seruantia tela cruorem claustraque portarum pendent: hic Punica bella, Aegatis cernas fusaque per aequora classe exactam ponto Libyen testantia rostra. hic galeae Senonum pensatique improbus auri arbiter ensis inest, Gallisque ex arce fugatis arma reuertentis pompa gestata Camilli, hic spolia Aeacidae, hic Epirotica signa et Ligurum horrentes coni parmaeque relatae Hispana de gente rudes Alpinaque gaesa. Sed postquam clades patefecit et horrida bella