Tarpeiae rupes superisque habitabile saxum et uos, uirginea lucentes semper in ara Laomedonteae, Troiana altaria, flammae, heu quantum uobis fallacis imagine teli promisere dei! propius si pressa furenti hasta foret, clausae starent mortalibus Alpes, nec, Trasimenne, tuis nunc Allia cederet undis. Sed Iuno, aspectans Pyrenes uertice celsae naua rudimenta et primos in Marte calores, ut uidet impressum coniecta cuspide uulnus, aduolat obscura circumdata nube per auras et ualidam duris euellit ab ossibus hastam. ille tegit clipeo fusum per membra cruorem, tardaque paulatim et dubio uestigia nisu alternata trahens, auersus ab aggere cedit. Nox tandem optatis terras pontumque tenebris condidit et pugnas erepta luce diremit. at durae inuigilant mentes molemque reponunt, noctis opus. clausos acuunt extrema pericli et fractis rebus uiolentior ultima uirtus. hinc puer inualidique senes, hinc femina ferre certat opem in dubiis miserando naua labori, saxaque mananti subuectat uulnere miles. iam patribus clarisque senum sua munia curae: concurrunt lectosque uiros hortantur et orant defessis subeant rebus reuocentque salutem et Latia extremis implorent casibus arma. ‘Ite citi, remis uelisque impellite puppim. saucia dum castris clausa est fera, tempore Martis utendum est rupto et grassandum ad clara periclis.