Nec parum prosperi successus quod sequitur. 
L. Sulla consul sociali bello, cum in agro Nolano 
ante praetorium immolaret, subito ab ima parte arae 
prolapsam anguem prospexit. qua uisa Postumi
aruspicis hortatu continuo exercitum in expeditionem 
eduxit ac † fortissima Samnitium castra cepit. quae 
uictoria futurae eius amplissimae potentiae gradus 
et fundamentum extitit.