ut noscat ipse civium motus, mea voce haud morabor iussa praefecti exequi. Chor. Quid fera frustra bella movetis? invicta gerit tela Cupido: flammis vestros obruet ignes quis extinxit fulmina saepe captumque Iovem caelo traxit. laeso tristes dabitis poenas sanguine vestro. non est patiens fervidus irae facilisque regi: ille ferocem iussit Achillem pulsare lyram, fregit Danaos, fregit Atridem, regna evertit Priami, claras diruit urbes: et nunc animus quid ferat horret vis immitis violenta dei. Nero O lenta nimium militis nostri manus et ira patiens post nefas tantum mea, quod non cruor civilis accensas faces extinguit in nos, caede nec populi madet funerea Roma quae viros tales tulit. at illa. cui me civium subicit furor, suspecta coniunx et soror semper mihi, tandem dolori spiritum reddat meo iramque nostram sanguine extinguat suo. admissa sed iam morte puniri parum est: graviora meruit impium plebis scelus: mox tecta flammis" concitant urbis meis,