licet et Phrygius praemia pastor: vincet vultus haec Tyndaridos qui moverunt horrida bella Phrygiaeque solo regna dedere. Sed quis gressu ruit attonito aut quid portat pectore anhelo? Nuntius Chorus Quicumque tectis excubat miles ducis, defendat aulam cui furor populi imminet, trepidi cohortes ecce praefecti trahunt praesidia ad urbis, victa nec cedit metu concepta rabies temere, sed vires capit. Chor. Quis iste mentes agitat attonitus furor? Nvnt. Octaviae favore percussa agmina et efferata per nefas ingens ruunt. Chor. Quid ausa facere quove consilio doce. Nvnt. Reddere penates Claudiae divi parant torosque fratris, debitam partem imperi. Chor. Quos iam tenet Poppaea concordi fide? Nvnt. Hic urit animos pertinax nimium favor et in furorem temere praecipites agit: quaecumque claro marmore effigies stetit aut aere fulgens, ora Poppaeae gerens, afflicta vulgi manibus et saevo iacet eversa ferro; membra per partes trahunt deducta laqueis, obruunt turpi diu calcata caeno, verba conveniunt feris immixta factis quae timor reticet meus. sepire flammis principis sedem parant, populi nisi irae coniugem reddat novam, reddat penates Claudiae victus suos.