nullumque telis impios numen petit, aeterna nox permaneat et tenebris tegat inmensa longis scelera, nil, Titan, queror, si perseveras. Atr. Nunc meas laudo manus, nunc parta vera est palma, perdideram scelus, nisi sic doleres. liberos nasci mihi nunc credo, castis nunc fidem reddi toris. Thy. Quid liberi meruere? Atr. Quod fuerant tui. Thy. Natos parenti Atr. Fateor et, quod me iuvat, certos. Thy. Piorum praesides testor deos. Atr. Quin coniugales? Thy. Scelere quis pensat scelus? Atr. Scio quid queraris: scelere praerepto doles, nec quod nefandas hauseris angit dapes — quod non parans! fuerat hic animus tibi instruere similes inscio fratri cibos et adiuvante liberos matre aggredi similique leto sternere — hoc unum obstitit: tuos putasti. Thy. Vindices aderunt dei; his puniendum vota te tradunt mea. Atr. Te puniendum liberis trado tuis.