quo more coetus publicos virgo petis? El. Adulterarum virgo deserui domum. Clyt. Quis esse credat virginem? El. Natam, tuam? Clyt. Modestiae cum matre. El. Pietatem doces? Clyt. Animos viriles corde tumefacto geris; sed agere domita feminam disces malo. El. Nisi forte fallor, feminas ferrum decet. Clyt. Et esse demens te parem nobis putas? El. Vobis? quis iste est alter Agamemnon tuus? ut vidua loquere: vir caret vita tuus. Clyt. Indomita posthac virginis verba impiae regina frangam; citius interea mihi edissere ubi sit natus, ubi frater tuus. El. Extra Mycenas. Clyt. Redde nunc natum mihi. El. Et tu parentem redde. Clyt. Quo latitat loco? El. Tuto quietus, regna non metuens nova: iustae parenti satis. Clyt. At iratae parum. morieris hodie. El. Dummodo hac moriar manu. recedo ab aris. sive te iugulo iuvat mersisse ferrum, praebeo iugulum tibi; seu more pecudum colla resecari placet, intenta cervix vulnus expectat tuum. scelus paratum est: caede respersam viri atque obsoletam sanguine hoc dextram ablue.