ut agilis altas flamma percurrit trabes. Hipp. Amore nempe Thesei casto furis? Ph. Hippolyte. sic est: Thesei vultus amo illos priores quos tulit quondam puer. cum prima puras barba signaret genas monstrique caecam Gnosii vidit domum et longa curva fila collegit via. quis tum ille fulsit! presserant vittae comam et ora flavus tenera tinguebat pudor: inerant lacertis mollibus fortes tori; tuaeque Phoebes vultus aut Phoebi mei. tuusque potius— talis, en talis fuit cum placuit hosti, sic tulit celsum caput: in te magis refulget incomptus decor; est genitor in te totus et torvae tamen pars «aliqua matris miscet ex aequo decus: in ore Graio Scythicus apparet rigor. si cum parente Creticum intrasses fretum. tibi fila potius nostra nevisset soror. te te, soror, quacumque siderei poli in parte fulges, invoco ad causam parem: domus sorores una corripuit duas, te genitor, at me gnatus. en supplex iacet adlapsa genibus regiae proles domus. respersa nulla labe et intacta, innocens tibi mutor uni. certa descendi ad preces: finem hic dolori faciet aut vitae dies. miserere amantis— Hipp. Magne regnator deum, tam lentus audis scelera? tam lentus vides?