magnus sibi ipse non facit finem dolor. Andr. Lacrimis, Vlixe, parva quam petimus mora est; concede patiens, ut mea condam manu viventis oculos, occidis parvus quidem, sed iam timendus. Troia te expectat tua: i, vade liber, liberos Troas vide. Astyan. Miserere, mater. Andr. Quid meos retines sinus manusque matris cassa praesidia occupas? fremitu leonis qualis audito tener timidum iuvencus applicat matri latus, at ille saevus matre summota loco praedam minorem morsibus vastis tenens frangit venitque: talis e nostro sinu te rapiet hostis, oscula et fletus, puer, lacerosque crines excipe et plenus mei occurre patri; pauca maternae tamen perfer querelae verba: 'si manes habent curas priores nec perit flammis amor, servire Graio pateris Andromachen viro, crudelis Hector? lentus et segnis iaces? redit Achilles.' sume nunc iterum comas et sume lacrimas, quicquid e misero viri funere relictum est, sume quae reddas tuo Oscula parenti, matris hanc solacio relinque vestem: tumulus hanc tetigit meus manesque cari. si quid hic cineris latet, scrutabor ore. Vlix. Nullus est flendi modus: abripite propere classis Argolicae moram.