Ira subit, deforme malum, lucrique cupido, Iurgiaque et rixae sollicitusque dolor: Crimina dicuntur, resonat clamoribus aether, Invocat iratos et sibi quisque deos: Nulla fides, tabulaeque novae per vota petuntur; Et lacrimis vidi saepe madere genas. Iuppiter a vobis tam turpia crimina pellat, In quibus est ulli cura placere viro. Hos ignava iocos tribuit natura puellis; Materia ludunt uberiore viri. Sunt illis celeresque pilae iaculumque trochique Armaque et in gyros ire coactus equus. Nec vos Campus habet, nec vos gelidissima Virgo, Nec Tuscus placida devehit amnis aqua. At licet et prodest Pompeias ire per umbras, Virginis aetheriis cum caput ardet equis; Visite laurigero sacrata Palatia Phoebo: Ille Paraetonicas mersit in alta rates; Quaeque soror coniunxque ducis monimenta pararunt, Navalique gener cinctus honore caput;