interim Karthaginienses classe apud insulas
 Aegates a Gaio C. Lutatio, consule Romanorum, superati statuerunt belli
 facere finem eamque rem arbitrio permiserunt Hamilcaris. ille etsi flagrabat bellandi
 cupiditate, tamen paci serviundum putavit, quod patriam exhaustam sumptibus diutius
 calamitates belli ferre non posse intellegebat, sed ita ut
 statim mente agitaret, si paulum modo res essent refectae, bellum renovare Romanosque armis
 persequi, donicum aut virtute vicissent aut victi manus dedissent.