itaque eum habuit ad manum scribae loco, quod multo apud
 Graios honorificentius est quam apud Romanos. namque apud nos, re vera sicut sunt,
 mercennarii scribae existimantur; at apud illos e contrario nemo ad id officium admittitur
 nisi honesto loco, et fide et industria cognita, quod necesse est omnium consiliorum eum
 esse participem. hunc locum tenuit amicitiae apud
 Philippum annos septem. illo interfecto eodem gradu fuit apud Alexandrum annos tredecim.
 novissimo tempore praefuit etiam alterae equitum alae, quae Hetaerice appellabatur. utrique
 autem in consilio semper affuit et omnium rerum habitus est particeps.