quo facto Lacedaemonii de diutina contentione destiterunt et sua sponte
 Atheniensibus imperii maritimi principatum concesserunt, pacemque iis legibus constituerunt,
 ut Athenienses mari duces essent. quae victoria tantae fuit Atticis laetitiae, ut tum primum
 arae Paci publice sint factae eique deae pulvinar sit institutum. cuius laudis ut memoria maneret, Timotheo publice statuam in foro
 posuerunt. qui honos huic uni ante id tempus contigit, ut, cum patri populus statuam
 posuisset, filio quoque daret. sic iuxta posita recens filii veterem patria renovavit
 memoriam.