erat intimus Dionysio priori, neque minus propter mores quam affinitatem.
 namque etsi Dionysii crudelitas ei displicebat, tamen salvum propter necessitudinem, magis
 etiam suorum causa studebat. aderat in magnis rebus, eiusque consilio multum movebatur
 tyrannus, nisi qua in re maior ipsius cupiditas intercesserat. legationes vero omnes, quae essent illustriores, per Dionem
 administrabantur: quas quidem ille diligenter obeundo, fideliter administrando crudelissimum
 nomen tyranni sua humanitate leniebat.