Conon Atheniensis Peloponnesio bello accessit ad rem publicam, in eoque eius opera magni
 fuit. nam et praetor pedestribus exercitibus praefuit et praefectus classis magnas mari res
 gessit. quas ob causas praecipuus ei honos habitus est. namque omnibus unus insulis
 praefuit, in qua potestate Pheras cepit, coloniam Lacedaemoniorum. fuit etiam extremo Peloponnesio bello praetor, cum apud Aegos flumen
 copiae Atheniensium ab Lysandro sunt devictae. sed tum afuit, eoque peius res administrata
 est: nam et prudens rei militaris et diligens erat imperator.