qua in re mihi ridicule es visus esse inconstans qui eundem et
				laederes et laudares, et virum optimum et hominem improbissimum esse diceres.
					 eundem tu et honoris causa appellabas et virum primarium esse dicebas
				et socium fraudasse arguebas? sed , ut opinor, laudem veritati tribuebas,
				crimen gratiae concedebas; de hoc, ut existimabas, praedicabas, Chaereae arbitratu
				causam agebas. 
				 fraudavit Roscius! est hoc quidem auribus animisque omnium
				absurdum. quid si tandem aliquem timidum, dementem, divitem, inertem
				nactus esset qui experiri non posset?