Solam fecisse id quod aliae meretrices facere fugitant. LACHES Phidippe, nostras mulieres suspectas fuisse falso Nobis in re ipsa invenimus: porro hanc nunc experiamur: Nam si compererit crimini tua se uxor credidisse, Missam iram faciet: sin autem est ob eam rem iratus gnatus, Quod peperit uxor clam, id leve est; cito ab eo haec ira abscedet. Profecto in hac re nihil mali est quod sit discidio dignum. PHIDIPPUS Velim quidem hercle. LACHES Exquire: adest: quod satis sit faciet ipsa. PHIDIPPUS Quid mihi istaec narras? an quia non tute ipse dudum audisti De hac re animus meus ut sit, Laches? illis modo explete animum. LACHES Quaeso edepol, Bacchis, mihi quod es pollicita tute ut serves. BACCHIS Ob eam rem vis ergo intro eam? LACHES I atque exple animum iis, ut credant.