Tantum quam re ipsa navigare incommodum est. PARMENO Itane est? SOSIA O fortunate, nescis quid mali Praeterieris qui nunquam es ingressus mare. Nam alias ut omittam miserias, unam hanc vide: Dies triginta aut plus eo in navi fui, Cum interea semper mortem exspectabam miser; Ita usque adversa tempestate usi sumus. PARMENO Odiosum. SOSIA Haud clam me est: denique hercle aufugerim Potius quam redeam, si eo mihi redeundum siet. PARMENO Olim quidem te causae impellebant leves Quod nunc minitare facere ut faceres, Sosia. Sed Pamphilum ipsum video stare ante ostium.