séd quisnam illic homóst, qui ipsus se cómest, tristis, oculís malis? ánimo hercle homost suo miser, quísquis est. Phronesivm Dignúst mecastor. néquam est. non nosti, óbsecro, militem, hic apud me quí erat? huius pater pueri illic est. úsque abegi, áspuli, iússi abi ret; tamen mánsit: auscultát, observat quám rem agam. Cyamvs Novi hóminem nihili. íllicinest? Phronesivm Íllic est. Cyamvs Me íntuetúr gemens; traxit ex intimo ventre suspiritum. hoc vide, dentibus frendit, icit femur; num obsecro nam hariolust, qui ipsus se verberat? Stratophanes Nunc égo meos animos víolentos meamque íram ex pectore iám promam.