Calliclem aiebat vocari qui has dedit mi epistulas. Charmides Meum gnatum hic quidem Lesbonicum quaerit et amicum meum, cuí ego liberosque bonaque commendavi, Calliclem. Sycophanta Fac me, si scis, certiorem, hisce homines ubi habitent, pater. Charmides Quid eos quaeris? aut quis es? aut unde es? aut unde advenis? Sycophanta Multa simul rogitas, nescio quid expediam potissimum. si unum quidquid singillatim et placide percontabere, et meum nómen et mea facta et itinera ego faxo scias. Charmides Faciam ita ut vis. agedum nomen tuom primum memora mihi. Sycophanta Magnum facinus incipissis petere. Charmides Quid ita? Sycophanta Quia, pater, si ante lucem íre occipias a meo prímo nomine, concubium sit noctis prius quam ad postremum perveneris. Charmides Opus factost viatico ad tuom nomen, ut tu praedicas. Sycophanta Est minusculum alterum, quasi vixillum vinarium. Charmides Quid est tibi nomen, adulescens? Sycophanta Pax, id est nomen mihi. hoc cotidianumst. Charmides Edepol nomen nugatorium, quasi dicas, si quid crediderim tibi, pax—periisse ilico. hic homo solide sycophantast. quid ais tu, adulescens? Sycophanta Quid est? Charmides Eloquere, isti tibi quid homines debent, quos tu quaeritas? Sycophanta Pater istius adulescentis dedit has duas mi epistulas, Lesbonici. is mi est amicus. Charmides Teneo hunc manifestarium. me sibi epistulas dedisse dicit. ludam hominem probe. Sycophanta Ita ut occepi, si animum advortas, dicam. Charmides Dabo operam tibi.