nam heri ambo in uno portu fuimus, sed mea hodie solutast navis aliquanto prius. age abdúce hasce intro, quas mecum adduxi, Stiche. Stichvs Ere, sí ego taceam seu loquar, scio scire te quam multas tecum miserias mulcaverim. nunc hunc diem unum ex illis multis miseriis volo mé eleutheria capere advenientem domum. Epignomvs Et ius et aequom postulas: sumas, Stiche. in hunc diem te nil moror; abi quo lubet. cadum tibi veteris vini propino.