Pól ego nunc ín malis plúrimis. Ampelisca Sócia sum, néc minor párs meast quam tua. séd videre éxpeto té. Palaestra Mihi es aémula. Ampelisca Cónsequamúr gradu vócem. ubi es? Palaestra Écce me. áccede ad me átque adi cóntra. Ampelisca Fit sédulo. Palaestra Cédo manum. Ampelisca Áccipe. Palaestra Díc, vivisne? óbsecro. Ampelisca Tú facis mé quidem ut vívere núnc velim, quóm mihi té licet tángere. ut víx mihi crédo ego hoc, té tenere. óbsecro, ampléctere, spés mea. ut me ómnium iám laborúm levas. Palaestra Óccupas praéloqui quaé mea orátiost. núnc abire hínc decet nós. Ampelisca Quo, amabo, íbimus? Palaestra Lítus hoc pérsequamúr. Ampelisca Sequor quó lubet. sícine hic cum úvida véste grassábimur? Palaestra Hóc quod est, íd necessárium est pérpeti. séd quid hoc, óbsecro, est? Ampelisca Quid? Palaestra Víden, amabo, fanum videsne hóc? Ampelisca Vbi est? Palaestra Ad déxteram. Ampelisca Videó decorum dís locum vidérier. Palaestra Haud lónge abesse opórtet homines hínc, ita hic lepidúst locus.