Dicam. viscum legioni dedi fundasque; eo praésternebant folia farferi. Lycvs Quoi rei? Antamonides Ad fundas viscus né adhaeresceret. Lycvs Perge. optume hercle perieras. quid postea? Antamonides In fundas visci indebant grandiculos globos, eo illós volantis iussi funditarier. quid multa verba? quemquem visco offenderant, tam crebri ad terram áccidebant quam pira. ut quisque acciderat, eum necabam ílico per cerebrum pinna sua sibi, quasi turturem. Lycvs Si hercle istuc umquam factum est, tum me Iuppiter faciat ut semper sacruficem nec umquám litem. Antamonides An mi haec non credis? Lycvs Credo, ut mi aequomst credier. age eamus intro. Lycvs Dum exta referuntur, volo narrare tibi etiam unam pugnam. Lycvs Nil moror. Antamonides Ausculta. Lycvs Non hercle auscultabo. Antamonides Quo modo? colaphis quidem hercle tuom iam dilidam caput, nisi aut auscultas aut is in malam crucem. Lycvs Malam crucem ibo potius. Antamonides Certumnest tibi? Lycvs Certum. Antamonides Tum tu igitur die bonó Aphrodisiis addice tuam mihi meretricem minusculam. Lycvs Ita res divina mihi fuit: res serias