Sunt mihi intus nescio quot nummi aurei lymphatici. Adelphasivm Deferto ad me, faxo actutum constiterit lymphaticum. Milphio Bellula hercle. Agorastocles I díerecte in maxumam malam crucem. Milphio Quam magis aspecto, tam magis est nimbata et nugae merae. Adelphasivm Segrega sermonem. taedet. Agorastocles Age, sustolle hoc amiculum. Adelphasivm Pura sum, comperce amabo me attrectare, Agorastocles. Agorastocles Quid agam nunc? Adelphasivm Si sapias, curam hanc facere compendi potes. Agorastocles Quid? ego non te curem? quid ais, Milphio? Milphio Ecce odium meum. quid me vis? Agorastocles Cur mi haec irata est? Milphio Cur haec irata est tibi? cur ego id curem? namque istaec magis meast curatio. † Agorastocles Iam hercle tu periisti, nísi illam mihi tam tranquillam facis quam mare olimst, quóm ibi alcedo pullos educit suos. Milphio Quid faciam? Agorastocles Exora, blandire, expalpa. Milphio Faciam sedulo. sed vide sís, ne tu oratorem hunc pugnis pectas postea. Agorastocles Non faciam. Adelphasivm Non aequos in me es, sed morare et male facis. bene promittis multa ex multis: omnia in cassum cadunt. liberare iuravisti me haud semel, sed centiens: dum te exspecto, neque ego usquam aliam mihi paravi copiam neque istuc usquam apparet; ita nunc servio nihilo minus. i, soror. apscede tu a me. Agorastocles Perii. ecquid agis, Milphio?