Vt ludó? Milphidippa Quid ego? ut sublécto? sed amábo, mitte me áctutum. Palaestrio Quin tu huíc respondes áliquid, aut fácturum aut non fácturum? Milphidippa Quid illám miseram animi excrúcias, quae númquam male de té meritast? Pyrgopolynices Iube eámpse exire huc ád nos. dic me ómnia quae volt fácturum. Milphidippa Facis núnc ut te facere aéquom, quom, quaé te volt, eandém tu vis, Palaestrio Non ínsulsum huic ingénium. Milphidippa Quomque me óratricem haud sprévisti sistíque exorare éx te. quid est? út ludo? Palaestrio Nequeo hércle equidem risú meo moderari. Milphidippa ob eám causam huc abs te ávorti. Pyrgopolynices Non édepol tu scis, múlier, quantum égo honorem nunc ílli habeo. Milphidippa Scio, et ístuc illi dícam. Palaestrio Contra aúro alii hanc vendére potuit operám. Milphidippa Pol istuc tibi crédo. Palaestrio Meri béllatores gígnuntur, quas híc praegnatis fécit, et púeri annos octíngentos vivónt. Milphidippa Vae tibi, nugátor. Pyrgopolynices Quin mílle annorum pérpetuo vivónt, ab saeclo ad saéclum. Palaestrio Eo mínus dixi, ne haec cénseret me advórsum se mentíri. Milphidippa Perií, quot hic ipse annós vivet, cuius fílii tam diu vívont? Pyrgopolynices Postríduo natus sum égo, mulier, quam Iúppiter ex Ope nátust. Palaestrio Si hic prídie natus forét quam ille est, hic habéret regnum in caélo. Milphidippa Iam iám sat, amabo, est. sínite abeam, si póssum, viva a vóbis.