Sanun es, qui puerum te esse dicas? Demipho Vera praedico. Lysimachvs Modo hercle in mentem venit, quid tu diceres: senex quom extemplo est, iam nec sentit nec sapit, aiunt solere eum rusum repuerascere. Demipho Immo bis tanto valeo quam valui prius. Lysimachvs Bene hercle factum, et gaudeo. Demipho Immo si scias, oculis quoque etiam plus iam video quam prius. Lysimachvs Benest. Demipho Malae rei dico. Lysimachvs Iam istuc non benest. Demipho Sed ausimne ego tibi eloqui fideliter? Lysimachvs Audacter. Demipho Animum advorte. Lysimachvs Fiet sedulo. Demipho Hodie ire in ludum occepi litterarium, Lysimache. ternas scio iam. Lysimachvs Quid ternas? Demipho Amo. Lysimachvs Tun capite cano amas, senex nequissime? Demipho Si canum seu istuc rutilum sive atrumst, amo. Lysimachvs Ludificas nunc tu me hic, opinor, Demipho. Demipho Decide collum stanti, si falsum loquor; vel, ut scias me amare, cape cultrum ac seca digitum vel aurem vel tu nasum vel labrum: si movero me seu secari sensero, Lysimache, auctór sum ut me amando enices. Lysimachvs Si umquam vidistis pictum amatorem, em illic est.