hanc ex longa longiorem ne faciamus fabulam. Lysidamvs Non irata es? Cleostrata Non sum irata. Lysidamvs Tuaen fidei credo? Cleostrata Meae. Lysidamvs Lepidiorem uxorem nemo quisquam quam ego habeo hanc habet. Cleostrata Age tu, redde huic scipionem et pallium. Chalinvs Tene, si lubet. mihi quidem edepol insignite factast magna iniuria: duobus nupsi, neuter fecit quod novae nuptae solet. Spectatores, quod futurumst intus, id memorabimus. haec Casina huius reperietur filia esse ex proxumo eaque nubet Euthynico nostro erili filio. nunc vos aequomst manibus meritis meritam mercedem dare: qui faxit, clam uxorem ducet semper scortum quod volet; verum qui non manibus clare, quantum poterit, plauserit, ei pro scorto supponetur hircus unctus nautea.