venire tu me gaudes: ego credo tibi; hospitium et cenam pollicere, ut convenit peregre advenienti: ego autem venturum adnuo. salutem tibi ab sodáli solidam nuntio: rogabis me úbi sit: vivit. Pistoclervs Nempe recté valet? Chrysalvs Istuc volebam ego ex te percontarier. Pistoclervs Qui scire possum? Chrysalvs Nullus plus. Pistoclervs Quemnam ad modum? Chrysalvs Quia si illa inventa est, quam ille amat, recte valet; si non inventa est, minus valet moribundusque est. animast amica amanti: sí abest, nullus est; si adest, res nullast: ipsus est—nequam et miser. sed tu quid factitasti mandatis super? Pistoclervs Egon ut, quod ab illoc attigisset nuntius,