Φιλάνθρωπόν ἐστιν ἂν παραδῶτέ με δημίῳ. Τοῦτο
ὤφειλον ἂν παθεῖν, εἰ καὶ θεραπαινίδα Ἑρμοκράτους
 ἀπέκτεινα. Τρόπον ζητήσατε κολάσεως ἀπόρρητον.
Χείρονα δέδρακα ἱεροσύλων καὶ πατροκτόνων. Μὴ
θάψητέ με, μὴ μιάνητε τὴν γῆν, ἀλλὰ τὸ ἀσεβὲς καταποντώσατε σῶμα.” Ταῦτα λέγοντος θρῆνος ἐξερράγη, καὶ πάντες
 ἀφέντες τὴν νεκρὰν τὸν ζῶντα ἐπένθουν. Ἑρμοκράτης
συνηγόρησε Χαιρέᾳ πρῶτος. “Ἐγὼ” φησὶν “ἐπίσταμαι τὸ συμβὰν ἀκούσιον ὄν. Βλέπω τοὺς ἐπιβουλεύοντας
ἡμῖν. Οὐκ ἐφησθήσονται δυσὶ νεκροῖς,
 οὐδὲ λυπήσω τεθνεῶσαν τὴν θυγατέρα. Ἤκουσα
 λεγούσης αὐτῆς πολλάκις ὅτι αὑτῆς μᾶλλον θέλει
Χαιρέαν ζῆν. Παύσαντες οὖν τὸ περισσὸν δικαστήριον
ἐπὶ τὸν ἀναγκαῖον ἀπίωμεν τάφον. Μὴ παραδῶμεν
χρόνῳ τὴν νεκράν, μηδὲ ἄμορφον τῇ παρολκῇ
ποιήσωμεν τὸ σῶμα. Θάψωμεν Καλλιρρόην ἔτι
 καλήν.” 
Οἱ μὲν οὖν δικασταὶ τὴν ἀπολύουσαν ψῆφον ἔθεσαν,
Χαιρέας δὲ οὐκ ἀπέλυεν ἑαυτόν, ἀλλ’ ἐπεθύμει
θανάτου καὶ πάσας ὁδοὺς ἐμηχανᾶτο τῆς τελευτῆς.
Πολύχαρμος δὲ ὁρῶν ἄλλως ἀδύνατον ἑαυτῷ τὴν σωτηρίαν “προδότα” φησὶ “τῆς νεκρᾶς, οὐδὲ θάψαι
Καλλιρρόην ὑπομενεῖς; ἀλλοτρίαις χερσὶ τὸ σῶμα
πιστεύεις; Καιρός ἐστί σοι νῦν ἐνταφίων ἐπιμελεῖσθαι
 
πολυτελείας καὶ τὴν ἐκκομιδὴν κατασκευάσαι
βασιλικήν.” Ἔπεισεν οὗτος ὁ λόγος·
 ἐνέβαλε γὰρ
φιλοτιμίαν καὶ φροντίδα. Τίς ἂν οὖν ἀπαγγεῖλαι
δύναιτο κατ’ ἀξίαν τὴν ἐκκομιδὴν ἐκείνην; Κατέκειτο
μὲν Καλλιρρόη νυμφικὴν ἐσθῆτα περικειμένη καὶ
ἐπὶ χρυσηλάτου κλίνης μείζων τε καὶ κρείττων, ὥστε
πάντες εἴκαζον αὐτὴν Ἀριάδνῃ καθευδούσῃ.