τῶν δὲ ἄλλων Εὐβοίᾳ προσφερομένων νυκτὸς Ναύπλιος ἐπὶ τοῦ Καφηρέως
				ὄρους πυρσὸν ἀνάπτει· οἱ δὲ νομίσαντες εἶναί
				τινας τῶν σεσωσμένων προσπλέουσι, καὶ περὶ τὰς Καφηρίδας πέτρας θραύεται τὰ σκάφη
				καὶ πολλοὶ τελευτῶσιν. ὁ γὰρ τοῦ
				Ναυπλίου καὶ Κλυμένης τῆς Κατρέως υἱὸς Παλαμήδης
				ἐπιβουλαῖς Ὀδυσσέως λιθοβοληθεὶς ἀναιρεῖται. τοῦτο μαθὼν Ναύπλιος ἔπλευσε πρὸς τοὺς
				Ἕλληνας καὶ τὴν τοῦ παιδὸς ἀπῄτει ποινήν·