ἐφʼ οἷς οὐχ οἷον ἄν τις παρὼν καὶ θεώμενος ὑπὸ
τὴν ὄψιν, ἀλλὰ κἂν ἀκούων καταπλαγείη τὸ τοῦ
κινδύνου μέγεθος καὶ τὴν τῶν πολιτευμάτων ἀμφοτέρων μεγαλομερίαν καὶ δύναμιν, στοχαζόμενος
ἔκ τε τοῦ τῶν ἀνδρῶν καὶ τοῦ τῶν νεῶν πλήθους.
 
οἱ δὲ Ῥωμαῖοι συλλογιζόμενοι διότι τὸν μὲν πλοῦν
εἶναι συμβαίνει πελάγιον, τοὺς δὲ πολεμίους ταχυναυτεῖν, πανταχόθεν ἐπειρῶντο ποιεῖσθαι τὴν τάξιν
ἀσφαλῆ καὶ δυσπρόσοδον.
 
τὰς μὲν οὖν ἑξήρεις δύʼ
οὔσας, ἐφʼ ὧν ἔπλεον οἱ στρατηγοὶ Μάρκος Ἀτίλιος
καὶ Λεύκιος Μάλιος, πρώτας ἐν μετώπῳ παραλλήλους
ἔταξαν.
 
τούτων δʼ ἑκατέρᾳ συνεχεῖς κατὰ μίαν ναῦν
ἐπιτάττοντες τῇ μὲν τὸν πρῶτον, τῇ δὲ τὸν δεύτερον στόλον ἐπέστησαν, ἀεὶ καθʼ ἑκάστην ναῦν ἑκατέρου τοῦ στόλου μεῖζον τὸ μεταξὺ ποιοῦντες διάστημα. ταῖς δὲ πρώρραις ἔξω νεύοντα τὰ σκάφη
τὴν ἐπίστασιν ἐπʼ ἀλλήλοις εἶχεν.
 
ἐπειδὴ δὲ τὸν
πρῶτον καὶ δεύτερον στόλον ἁπλῶς εἰς ἔμβολον ἔταξαν, ἐπέβαλον τούτοις ἐπὶ μίαν ναῦν ἐν μετώπῳ
τὸ τρίτον στρατόπεδον· ὧν ἐπιστάντων ἀπετελέσθη
τρίγωνον τὸ πᾶν εἶδος τῆς τάξεως.