Καὶ ὁ σπίνος ἐν οἰκίᾳ οἰκουμένῃ ἐὰν φθέγξηται
ἔωθεν, ὕδωρ σημαίνει ἢ χειμῶνα. καὶ χύτρα
σπινθηρίζουσα πᾶσα περίπλεως ὕδατος σημεῖον.
καὶ ἴουλοι πολλοὶ πρὸς τοῖχον ἕρποντες ὑδατικόν.
δελφὶς παρὰ γῆν κολυμβῶν καὶ ἀναδυόμενος
πυκνὰ ὕδωρ ἢ χειμῶνα σημαίνει. Ὕμηττος ἐλάττων, ἄνυδρος καλούμενος, ἐὰν τῷ
κοίλῳ νεφέλιον ἔχῃ, ὕδατος σημεῖον· καὶ ἐὰν ὁ
μέγας Ὕμηττος τοῦ θέρους ἔχῃ νεφέλας ἄνωθεν
καὶ ἐκ πλαγίου, ὕδατος σημεῖον. καὶ ἐὰν ὁ ἄνυδρος
Ὕμηττος λευκὰς ἔχῃ ἄνωθεν καὶ ἐκ πλαγίου.
καὶ ἐὰν περὶ ἰσημερίαν λὶψ πνεύσῃ, ὕδωρ
σημαίνει.