Caput I. De veterum Geographia. Anaximander Milesius, Thaletis auditor, sustinuit omnium primus situm
 orbis terrarum in tabula pingere. Post quem Hecatæus
 Milesius, vir multæ peregrinationis, idem argumentum tam accurate
 tractavit, ut homines in admirationem venerit. Nam Hellanicus Lesbius,
 quanquam doctissimus, absque colore et tabula ista
 tradidit. Deinde Damastes Cittiensis, qui plurima ex Hecatæo descripsit,
 circumnavigationem composuit. Mox Democritus et Eudoxus aliique nonnulli
 terræ circuitiones ac circumnavigationes composuerunt. Veteres ergo orbem habitabilem effigiarunt rotundum, mediam vero sitam
 esse Græciam, et ejus Delphos; obtinere enim umbilicum terrarum. Sed
 Democritus, cujus multa scientiæ experientia exstant, primus affirmavit
 terram esse oblongam; ita ut longitudo ad latitudinem habeat rationem
 sesquialteram. Cui sententiæ etiam Dicæarchus Peripateticus accessit.
 Eudoxus autem dixit longitudinem ad latitudinem esse in ratione dupla:
 sed Eratosthenes in majore quam dupla. Crates semicirculo assimilavit:
 Hipparchus similem mensæ: alii caudæ belluinæ: Posidonius Stoïcus fundæ
 tradidit, cujus media latitudo ab Austro in Boream
 pateat, angustior pars circa orientem et occidentem procedat; sic tamen
 ut latior sit, qua India pertinet ad Eurum.